Ma za Pippina e la majarìa

Quannu era nica, si mi dulìa la panza o avìa la frevi me zia mi facìa na speci di majarìa.

Mi dicìa ca èranu li vermi e ca era tuttu scantu. Si nni jiva e poi turnava a capulettu cu nu biccheri, nu chiattiḍḍu chinu d’ogghiu callu e agghiu.

Mi facìa mèttiri a panza ‘ncapu e scupirchiava la panza, astutava quasi tutti li luci e nni lu scuru accuminciava cu lu signu di la cruci. D’appressu pigghiava anticchia d’ogghiu di li manu e accuminciava a fari signa nta la me panzitta. Lu primu signu era sempri lu signu di la cruci partennu di la vucca di l’arma, doppu pigghiava l’agghiu e lu mittìa a lu centru di la panza e doppu cu lu biccheri vagnatu nnall’ogghiu callu lu pusava forti nta la panza sutta lu biḍḍicu. Mentri chi passava li manu e addubbava bonu bonu lu biccheri si murmurijava, pareva comu fussi jiuta nta n’autru munnu, iḍḍa diciva cosi ma ‘un sacciu soccu. Quannu stava pi finiri s’avìa a diri na speci di prijera, na speci di cantilena, chissa mi l’arricordu picchì l’avìa a diri puru iu.

Facìa d’accussì:

Luni é Santu 
Marti é Santu 
Mercuri é Santu 
Juovi é Santu 
Vènniri é Santu 
Sàbutu é Santu 
e la Duminica di Pasqua e lu vermi nterra casca e la Pasqua e lu Pascuni e abbutta lu virmuni, casca lu vermi a facci abbuccuni.

Addoppu si facìa lu signu di la cruci e na prijera a Diu e a tutti li santi.

Stu ritu ca parìa na majarìa iu nun lu capìa ma me zia parìa veru cumminta e divota e si lu biccheri arristava attaccatu a la panzitta, allura dicìa chi cc’èranu li vermi e ca avìamu fattu boni a fari lu ritu accussì li vermi si nni jèvanu..

Sulu ajeri m’arricurdai di sti fatti picchì nna lu fisiutirapista cc’era na cristiana ca parrava di li ciarmavermi e iu sintènnula m’arricurdai di me zia Pippina e accussì capìi ca iḍḍa era na ciarmavermi.

Soccu su’ li ciarmavermi? Sunnu fìmmini, certi voti puru màsculi, ca ànnu na grazzia di putiri guariri li genti di lu scantu picchì iḍḍi ànnu la magarìa di putillu fari. 

Sunnu cristiani arrispittati assaiuni picchì sunnu genti biniditti.

Li majari prima di mòriri ànnu a passari la magarìa a nu sulu cristianu pi putiri addivintari puru iḍḍi ciarmavermi.

Me zia Pippina nun sacciu si arriniscì a fallu picchì s’avìa paralizzatu e nun putìa cchiù parrari ma iu penzu ca lu fici lu stissu quannu si sintì ca stava pi mòriri.

Po’ èssiri ca tanticchia di ḍḍa majaria mi la passau puru a mia.

30-3-24

Maria Vincenza Lalicata

Ringraziamu David Paleino, Prisidenti di la Cademia Siciliana, chi l’abbirsàu.

Informazioni sull'autore

prof.ssa Maria Vincenza Lalicata

Author

*** La prof.ssa Maria Vincenza La Licata non è solo una straordinaria insegnante di informatica presso l'I.T.C. "G.B. Ferrigno" di Castelvetrano, ma è anche la nostra guida nell'universo affascinante dei cunta siciliani chiù antichi! Oh, mi raccomando, non spaventatevi se sentite un po' di accento canicattinese mescolato con un tocco di catanese...! La prof. La Licata ci porta in un viaggio indietro nel tempo, tra le pagine ingiallite dei cunta antichi, per riscoprire storie, avventure del passato che ci faranno ridere, riflettere e sognare! Sì, perché nella nostra Sicilia, ogni racconto ha un sapore unico, come il cannolo di Dattilo o la granita di la za' Titidda. Ppreparatevi a immergervi nelle avventure di un tempo che fu, dove il sole bruciava più forte, il mare era più blu e le stelle brillavano più luminose! La storia stia per cominciare!

Visualizza tutti gli articoli