Nta stu munnu unni si pensa sulu a spènniri sordi (pi cu’ l’àvi), parrari di zorbi e di pigghiari tempu pari na cosa chi ‘un cci trasi pi nenti. Puru picchì urmai tutti vonnu tutti cosi prestu e sùbbitu.
Pirò, li siciliani avemu na filusufìa tutta nostra. Lu sannu tutti chi semu filòsufi e campamu cent’anni. Ma tutta sta prescia? Adaciu chi lu tempu cc’è! Po’ si vidi!
Lagnusi semu? ‘Un cci trasi nenti la lagnusìa. Ni piaci fari li cosi, pirò senza prescia. Picchì lu tempu cci voli pi fari li cosi.
Pi esempiu, si ti vo’ manciari li zorbi, lu tempu cci voli pi fàrisi. L’hâ mettiri ncapu a la pagghia e hâ ‘spittari chi si fannu. Si pagghia ‘un nn’ài, li metti dintra a un panaru. Lu stissu è! Quannu addivèntanu scuri ti li po’ manciari, masinno’ arrèstanu virdi e su’ zurbusi. Eccu picchì dicemu “cu lu tempu e cu la pagghia si matùranu li zorbi”.
Lu tempu cci voli. Pi tutti cosi!
E allura:
- lassa jiri, po’ si vidi!
- lassa jiri, cu’ ti lu fa fari!
E chiudemu cu ‘na canzuna chi scrissi cu la me collega e amica carissima professoressa Vita Maria Russo quattr’anni fa. Un pezzu lu scrissi puru n’atra amica me, sempri quannu èramu tutti chiù sereni, la professoressa Mariella La Licata.
Mazara del Vallo 17.02.2018
Elena Alcamesi, Vita Maria Russo e Mariella La Licata
Ogni hiornu cosi di fari
A mia lu tempo mi l’ât’a dari.
Lu registru lu sistimasti?
Ma picchì tu mi lu dicisti!
Lu curriculu scadi oggi
Ma è cu’ li lèttiri chi t’arraggi.
Pigghia tempu e cci la fai
Pigghia tempu e camparai.
E sta cosa l’âm’a canciàri
Giustu ora lu vo’ fari?
Pi stasira amunì a curcari.
E dunanbi ni putemu parlari
Genti stranieri parteru ora ora
Acchiana e scinni cu l’occhi di fora
Santu vituzzu ajutami tu
Di stu sirbizzu ‘un ni pozzu cchiù
Senti a mia, po‘ si vidi
Sta’ sirenu, si tâ fidi.
Pigghia tempu, lassa jiri
Cchiù di chistu, chi t’hâ diri?
Riunioni oggi, cunsigghi dumani
E li ferie su ancora luntani
L’ùnica gioia è sulu un cafè
Chi ni pigghiamu dunni è-è.
Passa Natali e Pasqua a li porti
Sulu pi nuiatri sti cosi torti?
Mi nzonnu la stati e lu friscu la sira
Âm’a canciari st’aria chi tira…
Puru duminica a travagghiari
Correggi li còmpiti senza stancari
Mi ni niscissi di primu matinu
Di lamenteli un càntaru chinu
Ma picchì curri e sempri t’affanni
Statti cà e ‘un ti cunfunni
Lèvacci manu a tutti cosi
Mancia, vivi e t’arriposi
Senti a mia, poi si vidi
Sta’ sirenu, si tâ fidi.
Pigghia tempu, lassa jiri
Chiù di chistu, chi t’hâ diri?
Fattu ‘n cullabburazzioni cu Cademia Siciliana
Informazioni sull'autore
Bellissimo, considerazioni veramente azzeccate che descrivono efficacemente il senso del tempo tipico di noi siciliani. Un’ influenza non pigra, un assaporare il tempo, un godere l’attimo senza perdersi nella frenesia. Fare ciò che è da fare, il resto ‘po si vidi.
Bravissima Elena.
Bravissimi colleghi, avete scritto in poesia siciliana tutti i momenti che passano gli insegnanti nello svolgimento del loro lavoro. Momenti didattici ed anche di stress. Bravi